CHARLA INFORMATIVA "PLAN MAIOR DE SEGURIDADE 2016"

O próximo día 10 de marzo de 2016 realizarase na aula Multiusos de Fundación Ferama unha charla informativa dentro do programa "Plan Maior de Seguridade 2016" dirixido á prevención e mellora da seguridade dos nosos maiores e de toda a poboación en xeral. A acción formativa terá o seu comezo ás 16.30 horas, cunha duración aproximada de dúas horas.

O colectivo de persoas maiores de 65anos é o protagonista deste programa impulsado polo Ministerio de Interior, impartido pola Garda Civil; programa especial de seguridade cidadá dirixido a atender as necesidades deste grupo social no noso ámbito máis próximo.

O Ministerio do Interior deseñou e puxo en marcha un plan de actuación policial para mellorar a seguridade das persoas maiores. Este plan enmárcase nas medidas que se desenvolveron nos últimos anos para mellorar os niveis de protección dalgúns colectivos vulnerables (nenos e novos; e mulleres vítimas de violencia de xénero).

Os obxectivos do plan, denominado Plan Maior Seguridade, son esencialmente tres:

1.- Previr as principais ameazas que afectan á seguridade das persoas maiores (malos tratos nas súas diferentes vertentes; roubos e furtos, singularmente na contorna de entidades bancarias; e estafas)

2.- Fomentar a confianza das persoas maiores nas Forzas e Corpos de Seguridade do Estado e favorecer que denuncien calquera actuación delituosa que lles afecte.

3.- Perfeccionar a resposta policial na súa atención ás persoas maiores.

As persoas interesadas que desexen asistir poden apuntarse nas instalacións de Fundación Ferama ou chamando por teléfono ao 638 959 688.